Hei, og velkommen til sida mi!
Eg heiter Per Olav Noss, eg er født i 1980, og eg er frå Ål i Hallingdal! For tida bur eg delvis der, delvis i Oslo. Det beste eg veit her i livet er å syngje, skrive og lage melodiar, samt å lytte til andre sin musikk. Eg er definitivt ein pop-elskar, og sidan eg var ti år gamal, hadde eg eit sterkt ønske om å stå på scena og formidle fengande låtar i denne sjangaren.
Eg begynte så smått då eg var tolv, men det er ikkje meir enn seks år sidan eg bestemte meg for å satse på musikk meir eller mindre på heiltid. Det har vore nokre år der eg har vore innom litt forskjellig, og det var ikkje før på seinhausten 2007 eg kom på å byrje syngje på halling. Det heile var nok ein modningsprosess, for om nokon hadde foreslått dèt for meg berre eitt år tidlegare, hadde eg brote saman i krampelatter. Uansett så er greia at ting har losna etter at eg byrja med hallingpopen, både når det gjeld sang og skriving. Det er som om eit hav av emne og idèar opnar seg når ein berre finn sin eigen måte å gjere ting på.
Kva eg skriv om? Menneske som har kryssa meg på godt og vondt. Eg tykker populærmusikken ofte vert undervurdert. Her kan det liggje mykje glede, smerte, lengsel, humor og takksemd. I tillegg let eg meg i stor grad inspirere av gamle segner og mystikken i den storslåtte naturen der eg kjem frå. For det er til sjuande og sist naturen som bitt oss menneske saman, er det ikkje?
Eg bruker seie at det enkle ofte er det beste. Derfor har eg vald å berre kalle musikkarten min for hallingpop. Om eg likevel skal beskrive sjanger, så vil det bli programmert pop i retning elektronika med eit lite snev av folk. I nesten kvar låt har eg med eit levande instrument, som til dømes hardingfele, munnharpe eller gitar. Eg er veldig fornøgd med produsenten og alle musikerane på plateinnspelinga, og eg veit vi er i ferd med å få ferdig eit knallprodukt til dykk musikkelskarar der ute!
Tusen takk til alle som besøker denne sida, og til dykk som føljer med meg når eg opptrer live! Ha ein strålande dag!
Beste helsing
Per O Noss
