**$@m0@**

Sa matau ma le toto’a Tuisamau i le taeao nei pe tua i ni a lou faiva i le puni matatogo, E foliga mai o lea o le a sii lava lou gasegase Leulumoega, ona manatu lea, ta o ia e saili le puniloa a’o le a se tali mai o lupe o mau.Alipia ma le Faleiva faapea oe le Tumua Leulumoega, ua mae’a le galuega a lou faleupolu, ua uma foi ona tulei Aiga e te tausi, o lou punimatatogo lena.Leulumoega, e le o se gasegase faa-faleupolu lea ua e sii, ae o le gasegase-a-malo faa-Tumua, o le ala lea o le le fia nofonofo fua o Tuisamau,o lou uso tu’ofe faa-Tumua o le ta puniloa lena e malu ai Aiga, e malu ai o ta faleupolu, e le o le ta fatuaiga tausi ea lena faa Tumua?Poo fea lava e sii iai lou Sa Leulumoega, ou te le tuuna lava oe, leaga e tasi lo ta tupu’aga faa-Tumua, e tasi foi lo ta faiva alofilima aua la ta fatuaiga tausi i Tama ma o latou Aiga faapea Aiga ma o latou Tama. E malu ia oe ma a’u Tama ia ma Aiga ia, tainane so tatou va faafaleupolu ma tula o Samoa.Ona faapea lea o se tuualalo a Tuisamau, Leulumoega, o oe o le Matuamoepo, a o le matuafaitama, e te faapale i aso faapenei. Ae a pe a toe seu i fanua lou sa, sei toe taumafai e popo manu i fale? Sei toe aleaga tasi tautai o le vasa ae saili le atoa aua Aiga, aua le Faleaana, le Usoga ma le loaloa o Leulumoega aemaise Tumua ma lana tapuaiga.Ta te manumanu i lo ta faiva Tumua o le a sasaa solo, le ta upegalauga o le a satia i le fuefue. Leulumoega, o ai ea se poto na te toe suia faavae o Tumua? O le a- e- i- o- u matamatatetele lena a Samoa.Se o alofa na o alofa nei!Alofa mai a i le tatalo atu a Tuisamau, o lou uso tau-Tumua!