Pandereteres de Fitoria

El grupu “Pandereteres de Fitoria” remanez con esta formación va casi dos años. Hai seis años, delles amigues de diferentes asociaciones folclóriques decidieron entamar unes clases de pandereta col folclorista Fernando de la Puente Hevia n’Uviéu. Mentanto se daben les clases dexáronlo dalgunes y axuntáronse otres, afayándose pa ensayar en Fitoria, polo que Fernando-y punxo al grupu’l nome de “Pandereteres de Fitoria”. El repertoriu de cantares tradicionales, recoyíos per tola xeografía asturiana, que s’inxertaron a lo llargo d’estos años ye mui ampliu: ramos, cantares de boda, xotes, muñeires, bailles llixeros, rebudixos, xiraldilles, pasodobles... Interesaes nes estremaes muestres gráfiques que fueron recoyíes poles nuestres antecesores, y nel xeitu de tocar de caúna d’elles según la so procedencia, enfotáronse n’afondar un poco más nello y empecipiaron unes clases cola panderetera Eva Tejedor Mier: toques de xota, pasodoble, muñeira...a una o a dos manes, y peculiaridaes de zones como Tinéu, Llanes, Cuideiru... Va añu y mediu, cola formación actual, propunxéronse facer daqué distinto, sofitándose siempre nes melodíes tradicionales, cola gabita de Florentina Cuadriello Sánchez, llicenciada en musicoloxía. A lo llargo d’esti tiempu Pandereteres de Fitoria tuvo varies actuaciones: IV festival de música tradicional Xácara, XI festival internacional L’esperteyu, taberna folk Cuévano, sidrería Tierra Astur, IV Alcuentros N’alcordanza, Casa Cultura de Llugones, XXVII Selmana del folklore astur (La Pola Siero), XV Concursu y muestra de folklore “Ciudad de Oviedo”, Forum de la FNAC, Intercélticu d'Avilés, Centru polivalente d’Areñes, Nueche folk de Fitoria (a comuña con Tejedor), San Pedro en La Pola Siero, fiestes de San Xuan en Pando, fiesta de Los Humanitarios de Morea, Nueche folk en Corvera, Nueche Folk en Puerto La Cruz (Tenerife), intervenciones en colleutivos de muyeres...