Hvanndalsbræður

Hljómsveitin Hvanndalsbræður var stofnuð síðla árs 2002 af þeim Rögnvaldi Gáfaða Hvanndal (gítar/söngur), Sumarliða Hvanndal (bassi/söngur) og Val Hvanndal (trommur/söngur). Eftir hljómsveitina liggja fjórar plötur (út úr kú - hrútleiðinlegir - ríða feitum hesti - skást of). Fyrstu þrjár plöturnar eru uppseldar og ófáanlegar með öllu nema helst á svörtum markaði, fjórðu plötuna (Skást of) er hinsvegar hægt að nálgast í öllum skárri hljómplötuverslunum og hefur hún að geyma skástu lögin af fyrstu þrem plötunum ásamt tveimur nýjum. Hljómsveitin er léleg en strákunum finnst samt gaman að þessu, enda skiptir fátt annað máli. Hljómsveitin gerir út frá Akureyri og fer annaðslagið í tónleikaferðir um landið, eða þegar vel viðrar......í ágúst 2007 varð svo breyting á bandinu. Tveir bræður sem dvalið hafa á meðferðarheimilum fyrir vandræðaleg börn hingað til hafa komið í leitirnar, en á eftir að fá út úr DNA prófum reyndar en miðað við útlit og tónlistarhneigð er nokkuð ljóst að þeir eru Hvanndal. Þetta eru þeir Pétur Hvanndal (rafgítar/mandolín) og Valmar Hvanndal (fiðla/harmonikka). Nú verður rokkað !!